രുചികരം കാബേജും കോളിഫ്‌ളവറും : ഇലക്കറികളായ ശീതകാല വിളകള്‍

ശീതകാല വിളകളിലെ പ്രധാനികളായി കാബേജ്, കോളിഫഌര്‍, കോള്‍റാബി എന്നിവയെല്ലാം ഇലക്കറികളുടെ ഗണത്തിലാണു പ്പെടുത്തുന്നത്. ഇവ കൃഷി ചെയ്യുന്ന രീതികളാണിന്ന് ഇലക്കറികളെക്കുറിച്ചുള്ള പരമ്പരയില്‍ വ്യക്തമാക്കുന്നത്.

By Harithakeralam

2023-10-31

ശീതകാല വിളകള്‍ നടാനുള്ള ഒരുക്കങ്ങള്‍ മിക്കവരും തുടങ്ങിക്കഴിഞ്ഞിരിക്കും. കാലം തെറ്റിയുള്ള മഴയും തണുപ്പ് സീസണ്‍ ഇനിയും തുടങ്ങാത്തതുമെല്ലാം ചില തടസങ്ങള്‍ സൃഷ്ടിക്കുന്നുണ്ടെങ്കിലും നല്ല വിളവ് ശീതകാല വിളകള്‍ക്ക് ലഭിക്കുമെന്നു തന്നെയാണ് ഏവരുടേയും പ്രതീക്ഷ. ശീതകാല വിളകളിലെ പ്രധാനികളായി കാബേജ്, കോളിഫഌര്‍, കോള്‍റാബി എന്നിവയെല്ലാം ഇലക്കറികളുടെ ഗണത്തിലാണു പ്പെടുത്തുന്നത്.ഇവ കൃഷി ചെയ്യുന്ന രീതികളാണിന്ന് ഇലക്കറികളെക്കുറിച്ചുള്ള പരമ്പരയില്‍ വ്യക്തമാക്കുന്നത്.

കൃഷി രീതി

കാബേജും കോളിഫഌറും കൃഷി ചെയ്യാനുള്ള ഒരുക്കങ്ങള്‍ ഇപ്പോള്‍ തന്നെ ആരംഭിക്കണം. വിത്തുകള്‍ പാകി മുളപ്പിച്ചാണ് നടുന്നതെങ്കില്‍ ഇപ്പേള്‍തന്നെ  ട്രേകളില്‍ വിത്തുകള്‍ പാകി തൈകള്‍ തയ്യാറാക്കണം. 35- 40 കൊണ്ട് തൈകള്‍ മാറ്റി നടാനാകും. അല്ലെങ്കില്‍ ഗുണമേന്മയുള്ള തൈകള്‍ കൃഷി ഓഫീസുകള്‍, കാര്‍ഷിക സര്‍വകലാശാല നേഴ്‌സറികള്‍, സ്വകാര്യ നേഴ്‌സറികള്‍ എന്നിവിടങ്ങളില്‍ നിന്നു വാങ്ങി നടാം. ചകിരിച്ചോര്‍ കമ്പോസ്റ്റ് 80 %, അല്‍പ്പം ചാണകപ്പൊടി, തൈകള്‍ക്ക് ഫംഗസ് രോഗം വരാതിരിക്കാന്‍ അല്‍പ്പം ടൈക്കോഡെര്‍മ എന്നിവ ചേര്‍ത്ത് ട്രേകളില്‍ വിത്ത് പാകി മുളപ്പിക്കാം. 35-40 ദിവസങ്ങള്‍ കൊണ്ട് ഇങ്ങനെ പാകി മുളപ്പിച്ച തൈകള്‍ നടാന്‍ പാകമാകും.

Related News

അലങ്കാര ഇലച്ചെടികള്‍ ആരോഗ്യത്തിനും ആദായത്തിനും (രണ്ടാം ഭാഗം)

അലങ്കാര ഇലച്ചെടികള്‍ ആരോഗ്യത്തിനും ആദായത്തിനും

വിനയന്റെ ഫ്രൂട്ട്ഫാമില്‍ വിരിയുന്നത് പ്രവാസകാല സ്വപ്‌നങ്ങള്‍

വിപണിയറിഞ്ഞ് വാഴക്കൃഷി അഥവാ തിലകന്‍ മോഡല്‍

ശ്രദ്ധിക്കണം

നീര്‍വാര്‍ച്ച സൗകര്യമുള്ളതും നേരിട്ട് സൂര്യപ്രകാശം ലഭിക്കുന്നതും മണല്‍ കലര്‍ന്ന പശിമരാശിയുള്ള മണ്ണുമാണ് കൃഷിക്ക് നല്ലത്. അല്ലാത്ത മണ്ണിലും അത്യാവശ്യം മണലും ജൈവ വളങ്ങളും കൂട്ടി കൃഷിക്ക് അനുയോജ്യമാക്കാം. ചെറുചാലുകളുണ്ടാക്കി തൈകള്‍ അതില്‍ നടുന്ന രീതിയാണ് നല്ലത്. ഈ ചാലില്‍ അല്ലെങ്കില്‍ തടത്തില്‍ തണലത്തിട്ട് ഉണങ്ങിയ ചാണകപ്പൊടി, എല്ലുപൊടി, വേപ്പിന്‍ പിണ്ണാക്ക് എന്നിവ ചേര്‍ത്തു വേണം തൈകള്‍ നടാന്‍. 70 സെ.മി ഇടവിട്ട് ചാലുകളെടുത്ത് തൈകള്‍ തമ്മില്‍ 50 സെ.മി അകലത്തില്‍ നടാം. പോട്രേകളില്‍ ലഭിക്കുന്ന തൈകള്‍ വേരിളക്കം തട്ടാതെ വേണം നടാനായി എടുക്കാന്‍.

പരിചരണവും വളപ്രയോഗവും

നട്ട തൈകള്‍ക്ക് കുറച്ചു ദിവസം തണല്‍ നല്‍കണം. മൂന്നാഴ്ച കഴിഞ്ഞ് ഉണങ്ങിയ ചാണകപ്പൊടി അല്ലെങ്കില്‍ മണ്ണിര കമ്പോസ്റ്റ് കൂടെ കടലപ്പിണ്ണാക്ക്, വേപ്പിന്‍ പിണ്ണാക്ക് എന്നിവ കൂടി കലര്‍ത്തി തൈകള്‍ക്ക് ചുറ്റുമിട്ട് മണ്ണു വിതറണം. 15 ദിവസം കഴിഞ്ഞ് ഇതൊന്നുകൂടി ആവര്‍ത്തിക്കുക. മഴയില്ലാത്ത ദിവസങ്ങളില്‍ വൈകുന്നേരങ്ങളില്‍ വെള്ളം തളിച്ചു കൊടുക്കണം. നല്ല ജലസേചനം വേണ്ട വിളയാണ് കാബേജും കോളിഫഌറും. നട്ട് ഒരുമാസം കഴിഞ്ഞ് ചാണകം, കടലപ്പിണ്ണാക്ക്, വേപ്പിന്‍പ്പിണ്ണാക്ക് എന്നിവ പുളിച്ചതിന്റെ തെളി കൂടുതല്‍ വെള്ളം ചേര്‍ത്തു തടത്തിലൊഴിച്ചു കൊടുക്കുന്നത് ചെടിയുടെ വളര്‍ച്ചയ്ക്ക് ആക്കം കൂട്ടും. ഇങ്ങനെ രണ്ട് - മൂന്ന് തവണ 15 - 20 ദിവസം കൂടുമ്പോള്‍ ആവര്‍ത്തിക്കണം. കോളിഫഌറിനും കാബേജിന്റെയും ഫഌറിങ്ങ് നടക്കാന്‍ സമയമാകുമ്പോള്‍ ചാരം അഥവാ വെണ്ണീര് തടത്തില്‍ നല്‍കുന്നതും ഗുണം ചെയ്യും. തൈകള്‍ നട്ട് 50 ദിവസം കഴിയുന്നതോടെ ഒരു പിടി ചാരം തടത്തിനു ചുറ്റം വിതറി കൊടുക്കാം. 15 ദിവസം കഴിഞ്ഞ് ഒന്നുകൂടി ഇങ്ങനെ അവര്‍ത്തിക്കണം. ഹ്രസ്വകാല വിളയായ കാബേജും കോളിഫഌറും തൈ നട്ട് 80 - 90 ദിവസം കൊണ്ട് വിളവെടുക്കാന്‍ പാകമാകും.

രോഗകീട നിയന്ത്രണം

പലതരത്തിലുള്ള ഇല തീനി പുഴുക്കളാണ് സാധാരണയായി ശീതകാല പച്ചക്കറികളില്‍ കണ്ടുവരാറ്. ദിവസവും ചെടികളെ നോക്കി പുഴുവിനെ പെറുക്കി കൊല്ലുകയാണ് ഏറ്റവും നല്ല നിയന്ത്രണമാര്‍ഗം. രണ്ടുശതമാനം വീര്യമുള്ള വെളുത്തുള്ളി  വേപ്പെണ്ണ മിശ്രിതവും തളിക്കാം. ബാക്റ്റീരിയല്‍ രോഗത്തെ ചെറുക്കാന്‍ ജീവാണു കീടനാശിനികള്‍ ഉപയോഗിക്കാം. 20 ഗ്രാം സ്യൂഡോമോണസ് ഒരു ലിറ്റര്‍ വെള്ളത്തില്‍ കലക്കി ചെടികളില്‍ തളിക്കുക. ശീതകാല പച്ചക്കറി കൃഷിയിലെ മറ്റൊരു പ്രധാന ശത്രു ഒച്ചിന്റെ ആക്രമണമാണ്. ദിവസവും ഇലകള്‍ നിരീക്ഷിക്കുകയും ഒച്ചുണ്ടെങ്കില്‍ എടുത്ത് നശിപ്പിക്കുകയാണ് ഇതിനെതിരേയുള്ള മാര്‍ഗം. നീറ്റ് കക്ക പൊടിച്ചത്, കല്ല് ഉപ്പ് പൊടിച്ച് വിതറല്‍ എന്നിവയും ഒച്ചിനെതിരേ ഉപയോഗിക്കാവുന്ന മാര്‍ഗങ്ങളാണ്.

വിളവെടുപ്പ്

നന്നായി പരിപാലിച്ചാല്‍ കാബേജും കോളിഫ്‌ളവറും 50-60 ദിവസം കൊണ്ട് ഫഌറിങ്ങ് നടക്കും. തുടര്‍ന്ന് ഒരു മാസം കൊണ്ട് ഫ്‌ളവര്‍ വലുതാകുകയും വിളവെടുപ്പിന് പാകമാകുകയും ചെയ്യും. കോളി ഫഌറിന്റെ ഭക്ഷ്യയോഗ്യമായ ഭാഗത്തെ കര്‍ഡ് എന്നാണ് പറയുന്നത്.